Par une come me che e va a durmî cu lis gjalinis, e che doman e à di lâ a cjapâ su blave a man (lavôr cence pietât che ti sporcje e ti taie), lâ fûr usgnot al è stât un sfuarç avonde titanic.
Ma o soi stade propite contente di sintî Sandri Carrozzo, che cu la sô simpatie al à presentât in Biblioteche a Codroip, la “Odissee di Omêr” voltade par furlan cun Pierluigi Visintin. La leture di Jacum, verementri di buine cualitât, e à mostrât cemût che la nestre lenghe si adate a dut. Bisugne disi che al dipent tanton ancje de bravure dai nestris autôrs!
E jo che no finìs mai di jessi mestre, nancje cuant che o duar (e al samee che cuant che un al duar nol fâsi mâl a dinissun… par solit!) o ai bielzà pensât di fâur viodi ai fruts di cuinte la straordenarietât di cheste notizie. Ancje parcè che dal sondaç che o stoi fasint a scuele il risultât di un furlan tabaiât scuasit nuie a Codroip al fâs vignî une sorte di aviliment… E sì che lu savevi ancje cence scandais…
Ma no vuei rovinâmi cheste biele serade cun chescj pensîrs cussì cumò o voi là che no va la grape.
Doman di sere a 8 e mieze simpri in biblioteche a Codroip serade in onôr di Gianni Gregoricchio
Nessun commento:
Posta un commento