martedì 16 giugno 2009

...e duncje?

Ce cambiaraial inte scuele?
Nuie! Al restarà dut compagn.
Par fûr no saran in tancj a visâsi dal cambiament.
Tant al cambiarà par chei che no varan i mieçs par cirî jutori se il lôr frut al fâs un pocje di fature, o se al à cualchi dificoltât cul compuartament. E, in fin dai conts, no son migo tancj. Che si rangjin!

Ma pussibil che la storie e sedi simpri chê? Che no si rivi a fâ un salt di civiltât?

Alore, intal nestri circul i oraris a saran i stes par ducj i fruts de prime ae cuinte: 33 oris o 40 seont il model di scuele a timp sprolungjât o plen. Ma cussì a calaran lis oris di compresince che a saran di une ore o dôs seont il model di scuele. Al ven a stâi che no si fasaran plui laboratoris par recuperâ situazions di fature. E, sicome che il timp plen al à une grave soference, parcè che i fruts a stan a scuele 40 oris e bisugne daur la pussibilitât ancje di lavorâ par laboratoris, la psicopedagogjiste e riscje di saltâ. Cheste figure e lavore intal nestri circul di tancj agns. E je une mestre laureade distacade dal insegnament. Le vin volude parcè che e je impuartantone intal moment che si presente un problem cuntun frut: e viôt di chest frut, e dâ consulence ae mestre e ai gjenitôrs, e ten i rapuarts cui ents. Cence di je che e fâs di mediatôr, al è plui dificil valutâ une problematiche e fâle capî ai gjenitôrs e duncje judâ il frut...

O sin chi che si tirin sù la manie, ma a fuarce di tirâle sù, si viodin ducj i pei sot dai braçs e si sint ancje la puce. Sperìn che e rivi fin a Rome!