Salvans

Ben, ce biel
chest sît di Sandri Di Suald
scuviert par vie di un post di Romanini.
I fruts a diventaran mats cuant che ju fasarai lâ. I stes personaçs viodût suntun libri o sul visôr a son une altre robe. E po chei chi a son propite belonons!
Ancje se o voi mate pai libris.

Il Nadâl...

...al è il nassi di Jesus continuementri dentri di nô, fint cuant che si visarìn di vêlu!
Mi à rivade cheste mail e mi è parude cussì biele che us le passi a ducj, cul permès di pre Nesto.

Bon Nadâl
Us auguri un bon Nadâl cu l'aiût di cheste nativitât che o ai fotografât
a Feagne te glesie di San Jacum, dongje dal altâr de Madone.
Mi à incuriosît il gjal che al cjante su la scjale dai secui, dal timp. Chi
il pitôr lu fâs cjantâ sul cricà dal Gnûf Testament, come che al cjante la
lûs sul cricà di ogni dì, sul so nassi par mieç di une zovine di non Marie
e dal so marît, che i voleve verementri ben.
San Pauli, te letare a chei di Rome al scrîf che lui al è stât sielzût da
Diu a predicjâ il Vanzeli che Jesus, fi di Marie, pa inluminazion vude dal Spirt di Diu, al à puartât a ducj nô, inluminazion che ven dal cîl suntune cjâr misare come la nestre.
O sin invidâts ducj a considerâ cheste realtât, parceche Diu nus ame in Jesus e in Marie, baste che i crodedin che sin soi fis e fradis di Jesus Crist.
Se cjalìn ben il cuadri, su la diestre al è un om, vistût a blanc, simbul de persone di judizi e di sapience, che, di front ae realtât de nassite di une creature da doi che si vuelin ben e de puare int disposte a spartî chel pôc che an cun lôr, al tire ju il cjapiel, segn di riverence, e, tirant ju il cjapiel, al mostre che il Nadâl lu à fat rifleti. Al è lui che al ricêf la iluminazion, lu rint blanc, pûr.
Al è il Nadâl che nus salve!
Ma la grandece dal Nadâl a si ripet simpri cuant che une Marie a parturìs une creature clamade dal amôr insieme dal so Josef; la so creature e je sante e ancje lôr a son sants, par vie de fede, che ju fâs vivi la grandece di un Nadâl che si ripet tal timp dai secui.
O lassi a voaltris di contemplâ cheste nativitât e dutis chês che i nestris
presepis, cu la inventive di ogni autôr, nus fasin viodi; e no si finirà mai di contâle dute, parvie che la realtât da contâ e vivi, e je imense.
Se nus comovin i pastôrs, che àn vude vonde pore a puartâ i lôr donos a une famee che veve in chel moment bisugne, e a van a dute gnot, par che no si nacuarzin i grancj dal timp che ju varèssin tassâts inmò di plui, cirìn di judâsi ancje nô, ancje se di scuindòn, tant il Signor al viôt ancje tal scûr, par un Nadâl di lûs.
Udin, Borc dai crotârs, 2008
pre Ernesto Bianco

Puare 'save!

lei chi
dal blog di Laura Pozzar.
Jo o ai pôre di jessi mieze cuete.
No par che no vedi cussience di ce che al sucêt,
ma parcè che no salti fûr.
Par esempli o ai viodût ator imagjinis che a banalizin il Nadâl e chest mi fâs mâl, tant mâl, ma o fâs faturone a dîlu. Puare mai me!

Pâs

Chest post al è il plui adat.

Bon Nadâl a ducj.

BALÂ

"Dutis chestis peraulis (nomenadis prime: fâ lis marculis, fâ lis marcoletis, scjaraçule, trepetâ.... n.d.r.) a dan la idee di une foghe, di une gjonde, di un smaneç che a samein ai salts, ai bai, aes pirulis, aes marculis, che a son i stes de furlane (danze, n.d.r.)... Lis plui antighis testemoneancis su la glesie di San Marc in Alessandrie a ricuardi l'ûs de danze sacre o liturgjiche dai estatics Terapeutis egjizians, ma a son ancje i bai dai Dervis e Davide che al bale biel che a traspuartin la arcje de aleance... in conclusion la furlane e podarès jessi una danze sacre di origjin ebraiche..."
O gjiavi chest toc di Pierluigi Visintin scrit sul "Friûl e furlans te historie de ma vie di Giacomo Casanova", parcè che la idee dal bal e de gjonde si lein benon cun chest particolâr moment dal àn (specie se nol plûf!).

Il Gno Signôr che al ven intal mont in ogni moment de nestre vite,
cence che si inacuarzìn,
cumò al torne a nassi e cheste nassite e je gjonde e pâs,
soredut se il puest par fâlu nassi al è dentri di nô.

Si prepare un puestut biel cjalt di amôr par cui che nus stâ dongje, blanc o neri, furlan o triestin,
e si soflii intor il gust che si à di vê vût in regâl la vite, e di jessi come che si è cun dutis lis mancjancis e cun dutis lis cualitâts.

E po si bale, de sere fin ae matine,
si bale come mats par dute la felicitât che e sglonfe il cûr
e che e scjampe fûr di corse
a marculis,
e no si pues tignî....

E il Signôr si sente dongje di nô a bevi e a mangjâ e nus invide a fâ

fieste e fieste e fieste

dute la vite...

Il Web

Nossere zirant sul nuie dai canâi, il gno om al à becât il gno mestri Giorgio Jannis intune trasmission di TeleFriuli. Si fevelave di ambients di discussion sul web doprâts dai zovins. Ducj a vevin la lôr part di reson: cui che al pandeve il pericul di un doprâ il computer in maniere esagjierade cence spirt critic, e cui che al mostrave lis pussibilitâts positivis di un cjatâsi cuant che si è distants, di un doprâ Face Book o altris ambients, par dâsi un apuntament, cence spindi masse di telefonadis, o par discuti di un argoment.
Chel che mi à dât un pelut di fastidi al è stât che, in particolâr un professor di talian, no si sedi in grât a scuele di insegnâ a chescj fruts cemût orientâsi in chest mont virtuâl
che si mangje la none cun dute Scufute Rosse (viôt in Cjargne ce che al è sucedût)
se un nol à imprescj mentâi par difindisi.
Si critiche Internet cu la voie di eliminâ la rêt
come che si fos podût eliminâ la stampe dai libris o lis conseguencis dal pensîr che la tiere no je intal mieç!
O sin simpri indaûr di secui nô adults! E cussì i zovins a àn di rangjâsi e al è cui che al rive e cui che nol rive.

Il Missus

In chest moment prime di Nadâl si cjante il Missus di sere in dutis lis glesiis dal Friûl.
E je une tradizion de glesie di Aquilee.
Mi plâs di murî (o soi propite furlane!).
E mi plâs cjantâlu cun dute la vôs. Sperìn di no jessi masse stonade!
Une volte però al jere plui biel, cuant che la glesie e jere plene e ducj a cjantavin insiemit...

Zovine o vecje

Ce vuelial dî jessi zovins?
Si è zovins cuant che si fâs une esperience gnove
o une strade gnove
parcè che no si àn riferiments
e magari si va a sbati...!
Da rest,
l'idee di aghe frede,
la pôre di un clap sot il pêl de aghe,
il pussibil fastidi de aghe intai voi,
a frenin
la voie di butâsi
e li
un
al è vecjo
a dutis lis etâts.
Ma nol cjape la pache intal cjâf!

Avilide

O soi un tic avilide a pensâ che dut chest lavôr di laboratori che o fâs al riscje di murî, al à buinis probabilitâts di murî. Cu la lenghe... joi la lenghe!
Al è dificilon cambiâ par tornâ li che si è partîts.
Bisugne che mi inventi alc.
Cul an gnûf.
Cumò no ai voie.
Cumò o spieti Nadâl,
cu lis zornadis che si slungjin.

Vinars...

...di sere intal oratori di Codroip e je stade fate une videoconference cun Giancarlo Tonut che, insieme cu la femine Graziella, al è in Costa d'Avorio par un an a regalâ il so timp par une opare dal Centro Volontario Internazionale. In Etiopie invecit al è Paolo Caneva.
Tancj a son i volontaris che a Codroip in chescj ultins agns a son lâts a lavorâ in Perù e in Bosnie par cualchi setemane. Par lôr, un Nadâl di pâs cul nestri graziis par chel che a fasin o che a àn fat.

tecnologjie

Par un curicul di tecnologjie pe scuele,
scomençant dal asilo fin ae mediane, si fevele in chest sît di Paolo Gallici che al à coordenât i lavôrs di preparazion par un grup di tutor.
Lis ativitâts par preparâ i curicui pes scuelis in fat di talian, matematiche, storie e gjeografie e tecnologjie a tacaran in dute la provincie dal mês di Fevrâr.
Cuant che si fevele di tecnologjie no si fevele di computer, ma di un discors trasversâl une vore impuartant che intes scuelis si fâs ancje benon. Cumò al è il câs di dâi une dignitât che no à di vê nuie di mancul rispiet a chês altris materiis integrantlis e fasintsi integrâ.

La domenie

Domenie sin stâts a Lignan a viodi ce che al veve fat il timp.
E il mâr al jere li,
nus spietave
cul so lâ e tornâ di ondis.
Lis montagnis insom(p)
e cualchi naturâl toc di len
butât sù de burascje.
Vêr!

Vuê o sin lâts a cirî la tumbare di Merêt di Tombe
intal mieç dai cjamps plens di pocis,
prin che dute cheste aghe e slachi dut.
E al ploveve
parsore di 4.000 agns di storie
e mi vignivin i sgrisui jù pe schene.

Tu sei speciale - sui regâi (3)

Pai fruts al rive, al scugne rivâ Gjesù Bambin che passant il timp al è deventât Babbo Natale. O ai let un libri propite biel che ur à ancje plasût une vore ai fruts che lu àn scoltât. Si trate di "Tu sei speciale" di Max Lucado. Al è fûr za di cualchi an.

Sui regâi (2)

Il timp al è un regâl bielon, che tantis voltis no pensìn di fâ parcè che o sin simpri di corse.
Ma il timp di scoltâ cui che nus fevele,
di judâ cjalant intai voi un che nus cîr,
di mostrâ une biele muse cence dutis lis preocupazions scritis in ogni plee de piel,
di ringraziâ par chel che a fasin par nô,
al vâl plui di un ogjet.
Jo tantis voltis no mi fermi parcè che la persone no mi è simpatiche,
parcè che o ai tantis robis pal cjâf,
parcè che invecit di scoltâ o ai voie di tabaiâ jo,
parcè che o ai simpri une soluzion di proponi, ancje se chel altri nol à bisugne di soluzions, ma dome che tu lu scoltis, che tu tasis un moment.
Ancje cui fruts e je cussì... pôc, simpri masse pôc il timp...
e lôr a àn un dintut che al clope,
un fradi pene nassût a cjase,
i gjenitôrs a vore,
mâl di panze,
chel dongje che ju tormente par sot.
E tantis voltis si dîs "Spiete un moment!"... ancje ai fiis!
Il moment al passe. E dopo o lin a cirî il regâl!
Chest mi soi sintude di scrivi e chest o ai scrit.

Sui regâi (1)

A son agns che o soi cuintri dai regâi.
Al è masse dificil ricevi un regâl. Magari chê robe li tu le âs za.
O pûr, no tu le âs, ma no ti interesse nancje di vêle.
O pûr, no tu le âs, ti interesse di vêle, ma no cussì!
Plui dificil ancjemò al è fâ un regâl savint chestis robis. Chel che al ricêf, come te, al à scuasit dut e chel che i covente, i covente secont un so gust e no secont il to.
A mi mi plasarès podê dî a cui che o ai di regalâ alc,
che o darai chei bêçs
a cualchidun che al è inte situazion di cui che nol à guscj,
ma dome dibisugnis...
Però, se un no le pense come te magari si ofint...
O soi cuintri dai regâi.

Archeologjie par furlan

Scuele par furlan nol vûl dî insegnâ furlan, ma doprâ il furlan par insegnâ... e cussì Ninine dopo vênus fat cjatâ lis rispuestis a lis domandis dai fruts sul so blog e je stade ancje a cjatânus (cun grande disponibilitât e vignarà cuatri voltis parcè che cuatri a son lis classis tiercis che a stan lavorant su Rovul). E rive intun sac ros o intune scjate, e i fruts a deventin mats! Naturalmentri a àn domandis su Rovul, ma ur interesse ancje di savê ce non che e à Ninine, trops agns che e à e se e je maridade! E a tentin di cjacarâ par furlan... parcè che Ninine no sa tant ben il talian, come me.
Un pôc no ti crodin, ma un tic ancje sì...

l'ort (2)... il gno.

Ort: tiere di lavorâ cun passion se un al à il timp par fâlu.
Se no: desideri di tiere, passion cence disvilup... pudiesis e lacais,
cagocis par sot,
sut e jerbatis,
patatis cul bûs,
furmiis tes fraulis,
gjespis tes rosis dai cocins,
bestiis di patatis tes melanzanis,
cudumars zâi.
E cocis, grandis bielis cocis zalis nassudis bessolis intal ledan...

L'art da la jeche (1)

Tantis voltis mi capite di programâ la partecipazion a un incuintri, di lâ a une mostre... po dopo al ultin moment, mi romp e o stoi a cjase dantmi de stupide a pene che al è masse tart par lâ.
Mi à sucedût cussì ancje nossere, ma par fortune mi cognòs, e stant che o jeri ancjemò a scuele e duncje "fûr" (di cjase, che di cjâf no covente dîlu!) o soi lade
ae presentazion dal libri di Stiefin Montel.
Il "Manuâl critic pal ort" scrit di un che si intint di tiere di cuant che al veve 20 agns, al à vût preseâts presentadôrs in Pierluigi Cappello, Enos Costantini agronim e Gian Paolo Gri antropolic de Universitât di Udin. La presentazion in une sidrere de Aziende Agrarie Universitarie Servadei.
O ai scuviert che par ort si intint un puest sierât e che purtrop cheste peraule intai antîcs documents e je dome cuant che si fevele di robariis. Da rest nol è, parcè che no si podeve paiâ l'afit cu lis jerbis, ma cun siale e forment. Lis jerbis no duravin, a lavin di mâl a part l'ai e la civole...