Us passi ancje chescj gnognos chi...
I GNOGNOSAURS AL VISIONARIO!
LA
MOSTRE “GNOGNOWOOD: IL JURASSIC AL JERE DUT UN CINE” DI ANDREA “DREE”
VENIER E SARÀ INAUGURADE MARTARS AI 3 DI AVRÎL AES 6 DI SERE - JENTRADE
LIBARE
Udin
- In ocasion des celebrazions dai 3 di Avrîl, Fieste dal Friûl, il CAV –
Centro per le Arti Visive dutun cul CEC – Centro Espressioni
Cinematografiche di Udin, in colaborazion e cul finanziament de ARLeF
(Agjenzie Regjonâl pe Lenghe Furlane), al inaugurarà ae 6 di sere li dal Visionario di Udin in vie Asquini, la mostre “Gnognowood: il Jurassic al jere dut un cine!”
dal artist Andrea “Dree” Venier. Protagoniscj di cheste aventure a
saran i Gnognosaurs, simpatics dinosaurs gnognos che a fevelin par
furlan, metûts adun di Venier inte serie di fumets “I Gnognosaurs”. La
mostre si fasarà cun jentrade libare e la inaugurazion si davuelzarà cu
la presince dal autôr, che al sarà li ancje pes dedichis, e dal diretôr
de ARLeF William Cisilino.
Il
titul de mostre dal Visionario e je chê dal ultin libri sui
Gnognosaurs, li che chescj personaçs a jentrin intal mont dal cine. Cun
di fat il cine, daûr di ce che al dîs Venier, nol è stât inventât dai
fradis Lumière intal Votcent in France, ma milions di agns prime, intal
Jurassic, propit dai Gnognosaurs. Cussì o podarìn viodi in mostre, intal
formât origjinâl 70 x 100 cm, i posters dai “paleo-kolossals” plui
famôs che a àn anticipât la industrie moderne dal cine. Lavôrs di mestri
tant che “Forrest Gnogno”, che al sarà imitât milions di agns dopo cul
remake “Forrest Gump”, “Il bon, il brut, il gnogno” o “The Gnognos
brothers” (o ricuardìn che cualchidun di chescj posters a jerin za stâts
esponûts li dal Visionario intant de Mostre dal Cine intal Dicembar dal
2011).
Il
vivarôs alestiment inmaneât di Piera Nodari par Ateneo delle Idee, al
sarà inricjît cuntune selezion di taulis origjinâls dal fumet
“Gnognowood” e cun sagumis cartonadis che a rapresentin i personaçs dal
fumet stes. A saran proietâts ancje “booktrailers” (presentazions
filmadis dal libri) dai Gnognosaurs, animazions sperimentâls e
intervistis.
La mostre e restarà vierte fin a Domenie ai 15 di Avrîl e si podarà visitâ ducj i dîs intai oraris des proiezions. La jentrade e je sore nuie.
