Cuale scuele?

Cumò no pues plui tasê e il discors al è lunc.
Si sta pôc a dî “scuele furlane”, si sta pôc a dî “scuele”. Ma cuale scuele? Une scuele scualificade

cun mestris che a insegnin di 10 – 15- 20 agns insegnant dome matematiche o dome talian e che a varan di scomençâ di zero inte materie che no àn mai insegnât,

cun mestris che no àn fat inglês nancje intes mediis e che cuntun corsut a varan di insegnâlu al puest di personis cun tant di lauree!

une scuele di 27 oris e i fruts dopo un dulà ju metie? Cussì al tornarà il doposcuola… a paiament cun personâl che al varà di fâ esperience e duncje tal imprin e sarà dure…

une scuele cence laboratoris, parcè che no saran oris di compresince e intes superiôrs cence laboratori intes scuelis tecnichis (robis di mats!)

a metaran adun scuelis cun mancul di cent fruts e chest al volarà dî che o varin 27 fruts par classe e duncje chei brâfs a laran indenant e chei che no rivin… altri che “programmi personalizzati”! Cence pensâ ai pais che a restin cence scuele.

Inte scuele in chescj agns a àn bielzà taiât e savêso dulà? Sui plui debui: sul sostegno. Mancul oris pai fruts segnalâts. Mancul oris di compresince – cussì no tu recuperis chei che a fasin fature.

E se fin cumò lis mestris che o cognòs jo a vignivin a scuele cu la fiere par no creâ confusion ai fruts e a lis coleghis, di cumò indenant si vignarà ancje cuant che si è cence vôs dal dut parcè che, se no, ti trategnin bêçs su la paie. Robis fûr di ogni gracie di Diu!

E alore?
Ce scuele furlane podarìno pretindi? Se fin cumò cun grande fature o vin cirût di convinci insegnants e gjenitôrs de bontât dal furlan, cuant che no saran oris nancje par respirâ figurìnsi il furlan ce fin che al fasarà.