Nossere zirant sul nuie dai canâi, il gno om al à becât il gno mestri Giorgio Jannis intune trasmission di TeleFriuli. Si fevelave di ambients di discussion sul web doprâts dai zovins. Ducj a vevin la lôr part di reson: cui che al pandeve il pericul di un doprâ il computer in maniere esagjierade cence spirt critic, e cui che al mostrave lis pussibilitâts positivis di un cjatâsi cuant che si è distants, di un doprâ Face Book o altris ambients, par dâsi un apuntament, cence spindi masse di telefonadis, o par discuti di un argoment.
Chel che mi à dât un pelut di fastidi al è stât che, in particolâr un professor di talian, no si sedi in grât a scuele di insegnâ a chescj fruts cemût orientâsi in chest mont virtuâl
che si mangje la none cun dute Scufute Rosse (viôt in Cjargne ce che al è sucedût)
se un nol à imprescj mentâi par difindisi.
Si critiche Internet cu la voie di eliminâ la rêt
come che si fos podût eliminâ la stampe dai libris o lis conseguencis dal pensîr che la tiere no je intal mieç!
O sin simpri indaûr di secui nô adults! E cussì i zovins a àn di rangjâsi e al è cui che al rive e cui che nol rive.
7 commenti:
Biel post, par da bon.
Par me se la scuele e rive a insegnâ ai zovins a compuartasi ben, se rive a dâ lor lis nozions di fonde, e à za fât tant.
Il probleme è che i fantats par solit a san dut ce che al è di savê di netlog, facebook e worlds of warcraft, ma no àn la minime idee di ce che al è l'ordenadôr e plui di cualchi volte no àn neancje lis cognossencis fondamentals a rivuart de gramatiche e de artimetiche. E, piês di dut, une buine part di lôr no è usade a tasê e a stâ atente cuant che cualchidun cîr di spiegâ alc.
Ce isal sucedût in Cjargne?
Furlanist lei cheste: http://furlan.splinder.com/post/19306305/Conte+di+Nad%C3%A2l
Let, ehm...
No ai capît inmò cuissà ce... :-(
Ise une notizie?
E je la pussibile storie di Cappuccetto Rosso dai nestris dîs. Pussibilissime, secont me, se un zovin nol à spirt critic, ma si fâs cjapâ dal zûc o di Internet o ancje di ducj chei filmuts stupits e violents che a dan par television... Gjenitôrs e nonos tantis voltis no son in grât di judâ la zoventût parcè che no san. La scuele e à une grande responsabilitât.
Ah, no je sucedude alore (inmò). Duncje intant in chest câs al è cualchi adult a vê sgambiât la fiction pe realtât, eh eh eh...
Posta un commento