E
vignarà presentade
vinars
ai 28 di Fevrâr te Sale dal Consei
dal Comun di Remanzâs aes 11
di buinore la gnove campagne di comunicazion bilengâl “Aghe
Nestre”
nassude par informâ e par stiçâ un consum plui cussient e
responsabil de aghe potabile.
Il
progjet si insuaze dentri di une schirie di azions inviadis tal 2009
de Aministrazion comunâl par valorizâ e par favorî il consum de
aghe di rubinet - che a àn puartât ae nassite de Cjase de Aghe - e
par sensibilizâ la popolazion, massime i frutins de scuele primarie,
a un consum inteligjent des risorsis idrichis.
Cul
jutori de Leç 482 su la tutele des minorancis linguistichis
storichis che e à finanziât la campagne comunicative, la
Aministrazion di Remanzâs cul so Sportel pe Lenghe Furlane, e à
podût slargjâ ancjemò di plui il valôr di chestis iniziativis di
educazion socioambientâl realizant materiâi informatîfs di pueste.
Lis
tematichis frontadis, sore che marcjâ la impuartance des risorsis
idrichis e evidenziâ che no son cence fin, a presentin un belanç
dai consums bienâi de Cjase de Aghe, metint in lûs i vantaçs
economics e ambientâi, a sfantin i prejudizis su la aghe di rubinet,
a ufrissin conseis pratics par consumâ la aghe potabile cence
straçâle e a riciclâ dute chê pussibile e, in ultin, a judin i
fruts a capî cemût doprâ la aghe cun judizi modificant di pôc lis
piçulis usancis di ogni dì.
Cu
di fat il messaç che al cor dilunc di dute la campagne di
sensibilizazion al è:
La
aghe e je nestre e no vin di pierdile. Si che duncje...scurtìn i
consums - e scurtìn il Madrac! -.
Un
concet sempliç ma articolât in plui nivei disfrutant mieçs
comunicatîfs diferents che, partint dal materiâl didatic a fumuts
pai frutins de scuele primarie e passant pal librut informatîf che
al vignarà consegnât cjase par cjase a dute la comunitât di
Remanzâs, si complete di un messaç radiofonic trasmetût su
lis frecuencis di Onde Furlane che
al intint invidâ dute la comunitât furlane a cambiâ usancis e a
rifleti su la gjestion cuotidiane di une risorse publiche cussì
preziose come la aghe.
Il
progjet al è stât ideât e realizât di Priscilla De Agostini e
Oscar Marchese cul supuart grafic di Giulia Spanghero.
Nessun commento:
Posta un commento