ARCA e ONDE FURLANE a presentin la seconde edizion dal

Conciert pal Tiliment

une zornade di musiche ad ôr dal flum par celebrâ il Tiliment e difindilu dal progjet de autostrade Cimpel-Glemone.

Il conciert si tignarà domenie ai 26 di Avost des 14 fin che al ven scûr a Pontaibe, dongje Cuel di Pinçan (PN), dulà che l’Arzin si bute tal Tiliment. Il conciert al è a gratis e al sarà presint il miôr de musiche furlane:

Arbe Garbe, MiG-29 over Disneyland, Ulisse e i Ciclopi, Truc, Aldo Rossi, Matteo Segrado, Pantan,

GBU-The Good, the Bad and the Ugly, Eleonora Cedaro, RuznoTone

Aes 10 di buinore, escursion cul WWF su la Mont di Ruvigne, di chê altre bande dal flum rispiet al puest dal conciert. Compagnâts di Roberto Pizzutti, president dal WWF Friûl Vignesie Julie, si rivarà a un pont panoramic di indulà che si gjolt une viste magnifiche dal Tiliment, par capî cemût che al vignarès ruvinât de autostrade.

L’apontament al è aes 10:00 a Sant Pieri di Ruvigne, tal splaç ae crosere tra provinciâl 5 e vie dal Puint. In alternative si pues lâ sù in machine e cjatâsi cul grup dai cjaminadôrs aes 11:30, fasint une curte salide (40 m di dislivel) fin al pont panoramic. Dopo si podarà tornâ jù tal puest dal conciert, dulà che si cjate di gustâ des 13:00. Informazions e maputis sul sît www.comitato-arca.it

Vie pal dì, intervents di WWF, Legambiente, CAI e comitâts ambientâi.

Se il timp nol è biel controlait il sît www.comitato-arca.it

Cemût rivâ

Rivant di Maian-Flavuigne, zirait a çampe dopo dal puint sul Arzin e lait daûr des indicazions fin al puest dal conciert. Rivant di Pinçan, lait indevant viers Flavuigne e ae altece de frazion di Cjampeis o cjatarês lis indicazions al conciert. Se o vês voie di controlâ la posizion su Google Maps, scrivêt Colle di Pinzano al Tagliamento, il conciert si tignarà li dal cjamp di balon a man drete dal paisut di Cuel, propit ad ôr dal Arzin.