La mate

O cognòs une mate. Mate mate, spanade fuart di cuarante agns in ca, almancul. A 'nd à sessante (par me e jere spanade ancje prime...).
No i plâs la campagne, no sopuarte i paîs, no pues viodi la int di paîs che e je dute contadine "no pal lavôr che a fasin", volgâr e pôc fine. A je i plâs la citât, la int fine che e à cognossût cuant che e à lavorât a Padue, a Cortina. Si è cjatade ben a Udin, a Lignan. Jê no jere usade cussì (a son passâts trente agns!)
Dome che a vîf intun paisut dongje Codroip intun apartament che no si viôt mai il soreli. E, ossession continue, no fâs altri che lamentâsi. Il probleme al è che par puartâle in citât si passe pai paîs e, nol è nuie di fâ, jê si lamente.
Ti ven di dîsi "copiti, se no ti va ben nuie!". Ma jê no à voie di murî. Bon, alore o le copi jo, o pûr a provi a cirî di capîle... Dure.
Jo o adori intai paîs chês bielis cjasis di clap di une volte.... ma di sigûr un che al jere a stâ dentri une volte magari nol jere content: frêt, scûr e... jo no sai che no jeri.
Mi plasin di murî lis stradutis stretis cui puartons di ca e di là che a tu viodis dentri dut un altri mont, invisibil se il puarton al è sierât... ma di sigûr une volte nol devi jessi stât tant biel di cjaminâ di gnot cence lampions... lis brutis robis a capitavin ancje une volte.
La int. La int si zire se tu rivis e no ti cognòs e se ti cognòs ti cjale distès. Ti scuadre e intun lamp tu viodis scrit il coment su la muse... Se jo no cognòs no mi interesse, tant ca di doi seconts nancje no mi visi plui di chês personis li. Se o cognòs: fastidi, sì, fastidi. Ma tant ancje che al passi un pôc di timp cun chest ricuart, nol dure a lunc, cun dutis lis robis di ogni dì. E alore, chissene.
Jê no! A jê no i plâs la int di paîs.
E pûr no à tuart. A viôt profont, la mê mate! A lei intai voi di chei altris cuant che le cjalin e a pensin che e je spostade (parcè che a cjalâle intai voi, si viôt) e a ridin sot des mostacjis a viodile jê piçulute e taronde dongje di me, lungje e ni grasse ni secje, ma lungje. In citât, cun dute la int strane che e zire, nissun al fasarès câs, e duncje forsi la int di citât e podarès sameâ plui zintile... Ma!? A mi mi pâr che nus scuadrin ancje in citât...
A mi mi plâs la campagne cui mierlis che a cjantin matine e sere,
cul soreli che al jeve daur dai morârs e al va a mont che tu viodis che il mont al zire di corse,
cun chês bielis stradelis intal mieç dai cjamps che a stralusin di rosade a matine.
E mi plâs cjaminâ e respirâ l'aiarin fresc ancje se a rivin bugadis di cuninarie tirade sù a mangjime...

Dopo ducj chescj resonaments,
considerant che no je in parintât cun me,
che no je mê amie,
che o fâs une fature di bestie a sopuartâle,
che però o voi a cjatâle une volte par setemane e i rispuint cun calme ogni volte che e telefone (fortune che no soi mai a cjase...!),
che ogni volte mi tiri vie i miei ocjâi e o provi a cjalâ lis robis cui soi voi e mi pâr simpri che e vedi ancje la sô buine part di reson,
che e je une gjate che si muart le code e a sarà cussì par simpri considerât che a son 40 agns che le curin e no si viodin risultâts...

mi nas une piçule domande e no sai se o ai voie di rispuindi...

cuissà se e je jê la mate...?

Seconde part.
Cheste chi e je cussì mate ahe a van a cjolile par menâle ae Universitât de tierce etât, par menâle a fâ spese e al è parfin un zovin student di psicologjie che le mene une volte par setemane a Udin...
e i mandin parfin une siorute (di paîs, volgâr, che no i plâs par nuie!) a cambiâi i linçui intal jet...

Rispueste ae domande:
la mate o soi jo,
ma o crôt che tu sedis mat ancje tu che tu leis e chest mi console.
Maman!