Memorie

Ultin apontament da la rassegne dedicade a la Zornade da la Memorie e inmaneade da la Citât di Codroip:

domenie ai 12 di Fevrâr

a lis cuatri e mieze di dopodimisdì

inte sale conferencis da la Biblioteche Civiche Don Gilberto Pressacco

si tignarà l’incuintri

“LE STRADE DEL RICORDO”

par cure dal Liceu da lis Siencis Sociâls “Catarine Percude” di Udin.

Pe ocasion a saran ospits i siôrs Piccoli, fradis di Cividât e testemonis di une storie di deportazion a Auschwitz. Si mostrarà une video interviste pa la regje di Benedetto Parise cu la colaborazion ative di un trop di arlêfs dal liceu udinês. Il documentari al torne a dâ dongje, midiant documents e testemoneancis, la storie par nuie cognossude di dôs citadinis di Cividât, Elvira Schoenfeld Piccoli e sô fie Amalia che e veve pôc plui di vincj agns, depuartadis tal mês di Avrîl dal 1944 par resons raziâls. Si podarà lâ daûr a lis dôs protagonistis dilunc da la presonie prime a Udin e dopo a Triest ta la Risiere di San Sabba fin a la deportazion e il copament a Auschwitz.

La iniziative, coordenade da la prof.re Nicoletta Picotti, e viodarà ancje i coments musicâi e poetics componûts di pueste dai students dal Percude.

A la fin si podarà visitâ la mostre fotografiche e documentarie “Dalla persecuzione allo sterminio. I campi di concentramento nazisti”, metude sù lì da la jentrade da la Biblioteche e che si pues visitâ fin ai 17 di Març.

Un incuintri di no pierdi su la impuartance di “jessi memorie”, une memorie dulà che i zovins a son i protagoniscj.