Il flum

Mi puartarès a cjase
un toc di flum
pal so rumôr
limpi...
Ma no sai dulà metilu...

Sere

Al è dut un cra cra...
La stradele di ca e di là
di vert fresc e di colôr
profont di tiere
e prime un gri
e dopo un altri...
I arbui ...verts
scûrs neris...
Une lusigne, une sole ancjemò,
e impie il bosc.
O torni

Grignei di scuele - il gjornalut de scuele G.B.Candotti

Ringraziant il Signôr, al è praticamentri finît ancje il gjornalut di chest an.
Controi e corezion doman. E dopo in tipografie...
Ancje il gjornalut dal an passât al è premiât al concors dal Ordin dai gjornaliscj.

Cjistiei

Biele la iniziative di vierzi i cjistiei che a àn simpri un alc di magjic e fantastic inte fantasie.
Inte realtât nus puartin a dâ un cuc a un passât
particolarmentri scomut!
E ancje cumò li dentri al è ce lavorâ!

Chi i cjistiei di Darcjan (biei ancje i morârs), Vilalte (chi sot) e Duin (che o ai viodût intune altre zornade di ploie - uf! - cualchi setemane fa).

Interviste

La Ninine mi à fat une interviste che e je publicade su la Patrie dal Friûl dal numar dal mês di Març, cumò ancje sul web.

Lavagne

No ai mai fat esperience di lavagne digjitâl.
O lavori in laboratori e forsi par chest no ai vude bisugne e no mi soi interessade cuissà ce a cheste esperience.

Buine Pasche!

Al è resurît! ROBIS DI MATS! DI NO CRODI!

Al è resurît!

Ben bon, un Diu al podeve fâlu! Ce isal di strani?

Ma un Creatôr che al decît di fâsi creature (robononis!) e di fâsi copâ tra mîl torments, no isal fûr di ogni logjiche?
No l'om nol podeve concepî une idee strambe dal gjenar.
Al devi jessi stât alc altri...

Che e sedi vere?

Che al sedi vignût jù di là sù? A fâsi copâ tant che un delincuent? Tant che un sclâf? Che al sedi vignût jù par servînus?

Ce ideis!

Un creatôr che si fâs servidôr de sô creature!

No, no pues jessi une idee umane.
Nô un creatôr lu vevin simpri pensât fuart come un taur, come un sarpint, come un soreli... potent, cui muscui.

E chel chi?
Debil, umil, servidôr, l'ultin tra i ultins.

Bon, al à fat i soi meracui, ma no son chei che lu fasin diferent.
E po al à une grande considerazion de femine. Figuriti: al dâ a lis feminis il podê di testemoneâ la sô resurezion! A LIS FEMINIS... 2000 agns fa!

No, no je une idee umane. Nissun di nô nol darès di testemoneâ inte sô cause a cualchidun che non vâl nuie.

Par chest vuê o fâs fieste, fieste grande fûr cui miei, e dentri di me... une grande, grandonone fieste pal gno Signôr che al à vint par simpri la muart e al è vîf, vîf, vîf !