giovedì 30 dicembre 2010

2011

make a gif


Buine fin e bon principi a ducj!

Pal gnûf an

un ebook
cun libris par furlan


La robe e je interessante e di viodi miôr par preparâsi a un 
bon 2011.

domenica 26 dicembre 2010

giovedì 23 dicembre 2010

24

E se al è bielzà il 24 cemût fasio a rivâ in timp? Al è nulât, plui che nulât. Al sglavine.... no si viôt une stele! no si viôt LA stele. Cemût fasio a rivâ in timp?
O magari il timp al è bielzà passât e jo o soi chi che o cor ator ator cence savê che o soi simpri intal stes puest intun timp difarent e che no rivarai mai.
O magari o soi za rivade e no sai che o soi chi denant di un spetacul straordenari. Si sta pôc a no nacuarzisi dal fantastic che al è dongje e si spalanche i voi par robis grandis che no valin nuie. Piçul! Cussì piçul di no viodilu, di no savêlu. Cussi spetacolâr che no si mostre. Nol à bisugne di mostrâsi il meracul. No covente vê voi. Cence odôr, cence rumôr, cence savôr. Cence valôr. Come un nuie.
Prove cjale intal cîl tra une stele e chê altre, in montagne, intune gnot frede, cence aghe (!). Ce isal? Chel dut che al è di là dal confin dal gno jessi puntin suntun puntin tal Univers. E che al samee al nuie.

O speri di jessi in timp, doman, taponade intun cjantonut a cjalâ e jemplâmi i voi di sunôrs che nissun nol sa...

giovedì 16 dicembre 2010

Patrie

La Patrie dal Friûl cuintri dai erôrs Rai: scomençâ cu la programazion par furlan, invezit di spot fûr dal vade"Il Furlan nol è un dialet, ma une lenghe: tiraitlu vie de ultime campagne Rai" e je la posizion ferme da "La Patrie dal Friûl" (www.lapatriedalfriul.org) storic mensîl in lenghe furlane fondât tal 1946. "La Rai e varès di visâsi di meti in vore la leç 482/99 art 12 come 1, invezit di confondi la lenghe furlane cui dialets dal talian, e inserî dentri dai siei palinsescj une programazion in lenghe furlane. Metude in vore che e reste ancjemò in dì di vuê cence rispueste". Cun di plui al è ancje un erôr storic: "La campagne Rai e volarès celebrâ i 150 agns de Unitât di Italie, ma il Friûl al è stât anetût al ream di Italie dome tal 1866 e no tal 1861. Adiriture a son zonis dal Friûl orientâl che a son deventadis talianis dome dopo de prime vuere mondiâl" e precise la redazion da "La Patrie dal Friûl" che e siere "Cuissà se cualchidun si domandarà trops bêçs publics che a son stâts spindûts par spots che a son rivâts a unî la Italie... tal disdegn."

sabato 11 dicembre 2010

Propuestis di alfabetizazion

Centri Interdipartimentâl di Ricercje su la Culture e su la Lenghe a dal Friûl de Universitât di Udine e il MIUR Veneto a àn metût adun un cors:
STRUTTURARE MATERIALI: PERCORSI DI ALFABETIZZAZIONE NELLA SCUOLA PRIMARIA che al è stât fat in Otubar intal Cjadovri par insegnants di scuele primarie e di scuele mezane. La professore dal cors e jere Silvana Schiavi Fachin. Interessant il document

giovedì 2 dicembre 2010

Elicotars

Un papà militâr al à invidât la classe dai fiis a fâ une visite ai elicotars de sô caserme. Mi àn caturade ancje me, che o soi contrarie a gjitis e esercits, parcèche e mancjave une coleghe. Cussì al ultin moment o soi partide, in machine, naturalmentri, parcè che i pulmins no son omologâts par ducj i adults che a coventin. Cussì, a riscjo, in doi o sin lâts daur cu la machine, sperant che nol sucedès nuie ni a nô, ni ai fruts!
Visite interessante, cun ilustrazion de storie, des medais, dai elicotars, des missions di pâs. E dopo, visite ai elicotars. Elicotar di difese, par compagnâ e difindi cui che al puarte vivars e jutori in puescj di vuere, cun tant di mitrae e missii. Elicotar par puartâ ferîts cuntune biele pance gruesse par meti barelis e robe, se e covente. E dongje il bancut cun pistolis e fusii cun tant di spiegazion su cemût che si smicje  al "bersaglio". Cuissà mai ce che al sarà ches "bersaglio"... E un frut che al domande: "Come si fa a distinguere gli amici dai nemici?" Biele domande! Propite biele.
O soi furibonde o forsi dome un grun avilide.