fisiche par furlan

Ancje nossere e jere une serade cjalde di passâ fûr in biele compagnie e cussì ai Colonos di Vilecjasse o sin lâts a sintî Sergjo Cecot che al fevelave par furlan dai principis fisics che a stan sot de opare de Nature... "Nuie di masse, ma cence esagjerâ" al è chel che al capite ator di nô cuant che al cole un piruç o cuant che la lûs e passe par doi mieçs come aiar e aghe...
Facil di capî o parcè che Cecot al è brâf o parcè che la spiegazion e risulte plui facile par furlan. Cussì mi è sameât fin cuant che i argoments no son lâts fûr de mê puartade! E no ai ancjemò capît nuie de teorie de relativitât e de fisiche quantistiche, no parcè che no sedin stadis spiegadis ben, ma parcè che mi volarès cualchi lezionute di plui.
Da rest o vîf ben distès e nossere si stave propite ben sot lis stelis che a stavin ben picjadis ancje se no sai par cuale leç fisiche (forsi chê de ereditarietât cussì che si puès aprosimâ tant che mai che si à simpri resòn... al devi jessi ancje cualchi politic che al dopre cheste proprietât par justificâsi...!).

çurçuvint

Nossere intal cjistiel di Glemone o ai viodût "Cercivento" cun Maranzana e Somaglino. E je la storie di doi soldâts che a àn conseât ai lôr comandants di no fâ un atac suicide. Processâts e condanâts, il spetacul nus mostre la atese di jessi copâts cu la cussience nete.
La pôre, la rabie, il dolôr, la delusion, la stupiditât de vuere, il valôr dal om come om di ca e di là dal front a vegnin fûr cun dute la lôr fuarce diventant fisics che si ramenin e si imberdein, che si cirin e si tachin ae vite cun disperazion.
Mi è plasût une vorone.
L'uniche robe che no rivi a gloti e che e je presinte come che no si podès fâ di mancul e je la blesteme. Blesteme in sene. Come disi che e je justificade intal vivi di ogni dì. NO!