Bibie

I events:          ai 3 di Març – La Bibie par un popul;
ai 17 di Març – Un popul cu la sô Bibie;
ai 26 di Març – l’Arcivescul di Udin al incuintre i letôrs.


La iniziative “Leture continue de Bibie par furlan - Lettura continua della Bibbia in Friulano” al è un event unic tal so gjenar par vie che pe prime volte la Bibie e vignarà lete fûr par fûr, cence polse, intune lenghe minoritarie li la Glesie de Puritât (Udin) di domenie ai 3 di Avrîl 2011 a sabide ai 9 di Avrîl.
Organizade de ARLeF – Agjenzie Regjonâl pe lenghe furlane, de Provincie di Udin, de Arcidiocesi di Udin e de Associazion Culturâl Glesie Furlane, e à ancje la adesion des Provinciis di Gurize e di Pordenon, de Arcidiocesi di Gurize e de Diocesi di Concuardie-Pordenon e il patrocini de Regjon Friûl Vignesie Julie e dal Comun di Udin.

Par rimarcâ ancjemò di plui la atenzion su la iniziative e sul puest sede de leture continue, a son stadis pensadis 2 seradis “colaterâls” al event di Avrîl: il prin incuintri, curât de Associazion Culturâl Glesie Furlane, si davuelzarà joibe ai 3 di Març aes 20.30 li de Glesie de Puritât (Udin – dongje dal Domo) e al è intitulât “La Bibie par un Popul”, li che a intervignaran i protagoniscj de preparazion e de aprovazion dal test voltât:
-          Bonsignor Duilio Corgnali, tal 1977 vicjari episcopâl pe culture de Arcidiocesi di Udin e coordenadôr de Comission interdiocesane dai bibliscj e teolics pe preparazion de Bibie. Al è stât il protagonist dal ricognossiment uficiâl;
-          Pre Romano Michelotti e Pre Antonio Cappellari, components de comission e amîs personâi dal tradutôr Pre Antonio Bellina.

L’altri incuintri, “Un Popul cu la sô Bibie”, par cure dal diretôr artistic dal event, Federico Rossi, al è previodût par joibe ai 17 di Març aes 20.30, simpri li de Glesie de Puritât, e al varà come argoment la impuartance de dimension antropologjiche e de identitât culturâl tal orizont universalistic de Bibie.  A intervignaran:
-          Bonsignor Rinaldo Fabris, docent di esegesi bibliche e President de Associazion Bibliche Taliane;
-          Prof. Franco Fabbro, neuropsicolic e docent di neuropsichiatrie infantîl ae Universitât dal Friûl.
Al sarà propri il Diretôr Artistic dal event “Leture continue de Bibie par furlan” a presentâ il dibatit.

Infin, al è previodût par sabide ai 26 di Març aes 15.30 te Catedrâl di Udin, l’incuintri spirituâl cul Arcivescul di Udin, Bons. Andrea Bruno Mazzocato, e i letôrs-volontaris. E sarà la ocasion par ringraziâju de lôr disponibilitât e sotliniâ la impuartance de lôr azion a servizi de proclamazion de peraule di Diu.