Turoldo

Ai 6 di Fevrâr al cole il diesim novesim aniversari de muart di pari David Maria Turoldo (1992-2011) e par memoreâ cheste ricorence il Comun di Sedean – Assessorât ae Culture, cul patrocini de Provincie di Udin, in colaborazion cu la Associazion culturâl pari David Maria Turoldo e cul Grup artistic austriac ART 13 al à organizât une schirie di events par ricuardâ la figure e le opare dal frari sai Sierfs di Marie cul titul “La bielece e salvarà il mont”. Un cjamp tematic te pluralitât dal vivi – Manifestazions Turoldianis 2011.

Il program dai apontaments si disviluparà in doi fins setemanis di Fevrâr (ai 5-6 di Fevrâr/ ai 26 di Fevrâr) e intun fin setemane di Avrîl (ai 9 di Avrîl).

Si scomence sabide ai 5 di Fevrâr aes 16.00 li de Cjase di nassite dal frari (Coder, vie C. Percoto, 7/1) cun “Spiritualitât – Podê de peraule – Podê de imagjin”: scree de mostre des oparis pitorichis dal grup artistic ART13. A intervignaran bons. Nicolino Borgo che al curarà la presentazion e introduzion, Ulrike Spontina pe Lezion Magjistrâl, spazi po dopo a Stefan Pirker cu lis sôs interazions artistichis e conclusions cun riflessions e sponts turoldians. Impuartante cheste colaborazion disvilupade cul grup ART13. La presince di artiscj che a vegnin de Austrie e da ancjemò plui valôr al event e e permet di lâ indenant tal slargjâ i contats regjonâi, fûr regjon e internazionâi partint de figure di pari Turoldo. I teritoris li che al è nassût a vegnin cognossûts in cheste maniere fûr dai confins comunâi e a Cjase Turoldo e di Cjase Turoldo a rivin e a partissin iniziativis gnovis che a confermin, se ancjemò al covente, la sielte che e cjalave indenant di cui che al à volût recuperâ la cjase regalade dal frari al Comun, destinantle a centri culturâl di nivel, sore che lûc de memorie.

Domenie ai 6 di Fevrâr aes 11.00 li de Glesie dedicade ai Ss. Filippo e Giacomo di Coder di Sedean e vignarà dite la messe in ricuart dal frari, propit te zornade li che al cole il diesim novesim aniversari de muart. La messe grande e vignarà cjantade de “Corâl Sante Margarite di Rivis”, direte dal mestri Giorgio Molinari.

Sabide ai 26 di Fevrâr aes 16.00, ancjemò te Cjase di nassite, spazi al “Belanç di une esperience e prospetivis pal avignî” – Presentazion dal gnûf statût de associazion culturâl pari David Maria Turoldo cun assemblee dai socis, gnovis adesions e rignuviment des cjariis. E sarà la ocasion par atualizâ, a distance di tancj agns, mantignint il pensîr turoldian simpri tant che pont di riferiment, cualchidune des finalitâts de associazion, integrantlis cun prospetivis gnovis risultât di senaris culturâi e sociâi modernis, che cun chestis si à di confrontâsi in maniere inevitabile denant dal cori naturâl dal timp.

Il cicli di apontaments si sierarà sabide ai 9 di Avrîl aes 15.00, li dal centri culturâl “Il Ridotto” (Coder, place Cavour, 4), dulà che si davuelzarà l’incuintri di riflession cul titul “La bielece e salvarà il mont”. Un cjamp tematic te pluralitât dal vivi par cure di bons. Nicolino Borgo e de prof.e Antonella Anghinoni – bibliste.

Un calendari di apontaments che al prepare a chel che al sarà l’impegn pal 2012, cuant che a colaran cun di fat i vincj agns de muart dal citadin innomenât, frari, teolic, poete e si è za daûr a lavorâ in colaborazion cu la Associazion dedicade a lui par meti jù une propueste culturâl impuartante.

IL SINDIC

p.i.elt. DINO GIACOMUZZI