La stagjon dai
apontaments culturâi de Sierade inmaneâts de Aministrazion Comunâl
di Sedean si scree vinars ai 7 di Otubar 2011, aes nûf mancul un
cuart di sere, li dal Country resort “Là di Mariute”, a Coder
di Sedean (vie Caterine Percude, n. 7/4) cu la presentazion dal
libri di Nicoletta e Luigino Vador “Il maestro di violino”. Il
test, che al à vût un ricognossiment speciâl tal Concors Nazionâl
di Narative Logos 2010 e che al à otignût il secont premi tal
Concors Internazionâl di Narative “Roberto Micheloni 2011”, al
conte il patiment cence fin de anime di Marco, un fantaçut che a
dodis agns al à di frontâ la tragjiche pierdite dal pari.
“Il maestro di
violino” al è une conte di atmosferis, di desideris, di bruts
siums, di ricuarts, che a compagnin i personaçs e il letôr ae
scuvierte des vicendis de famee cuant che invezit sul sfont si
slungje la campagne furlane, piturade in maniere poetiche tal passâ
des stagjons, des oris, dai dîs, e che, in cualchi maniere, e je un
spieli des domandis di Marco.
Ae iniziative,
inmaneade cul contribût de BCC Friûl Centrâl e in colaborazion cul
Country resort “Là di Mariute”, a cjaparan part i autôrs
Nicoletta e Luigino Vador. Nicoletta Ros e leiarà ai presints
cualchi toc gjavât fûr dal libri e il “Quartetto Tetradico” al
acompagnarà dal pont di viste musicâl la presentazion. E vuide la
serade Gloria Ros.
Si ricuarde cun di
plui che, aes 7 di sere, prime de presentazion dal libri, al è in
program un percors vuidât e gratuit par visitâ la cjase indulà che
al è nassût Pari David Maria Turoldo e che si cjate juste dongje
dal puest indulà che si tignarà la iniziative. Tal resort “Là di
Mariute”, invezit, si podarà mangjâ, a paiament, i plats
preparâts cu lis specialitâts de zone, sedi prime che dopo la
presentazion.
L’Assessôr ae culture
Elena Zanussi
Il Sindic
Dino
Giacomuzzi
